ព្រៃវែង៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន ថាសម្ដេចបញ្ចប់ដំណើរជួបជាមួយនឹងពលរដ្ឋរងគ្រោះដោយទឹកជំនន់ នៅថ្ងៃទី៣០ ខែតុលា ឆ្នាំ២០២២ នេះធ្វើការជាមួយនឹងអាជ្ញាធរខេត្តដែលមានពលរដ្ឋរងគ្រោះដោយទឹកជំនន់ជាបន្តវិញ។ ការសម្រេចផ្អាកជួបពលរដ្ឋរងគ្រោះដោយទឹកជំនន់នេះគឺដោយសារតែសម្ដេចតេជោនិងមានជំនួបជាច្រើនក៏ដូចជាកិច្ចប្រជុំខែវិច្ឆិកា ឆ្នាំ២០២២។ 

នេះបើតាមប្រសាសន៍របស់សម្ដេចតេជោក្នុងជំនួបជាមួយនឹងប្រជាពលរដ្ឋដែលរងគ្រោះដោយទឹកជំនន់ក្នុងខេត្តព្រៃវែងព្រឹកថ្ងៃទី៣០ ខែតុលា ឆ្នាំ២០២២។ 

កម្ពុជាបានក្លាយជាប្រធានអាស៊ានប្ដូរវេននៅថ្ងៃទី០១ ខែមករា ឆ្នាំ២០២២ បន្ទាប់ពីប្រទេសព្រុយណេ។ ជាប្រធានអាស៊ានឆ្នាំ២០២២ កម្ពុជាមានការងារជាច្រើនដែលត្រូវចូលរួមដោះស្រាយរួមមានវិបត្តិបញ្ហាសមុទ្រចិនខាងត្បូង បញ្ហានៃប្រទេសមីយ៉ាន់ម៉ា និងបញ្ហាអន្តរជាតិមួយចំនួនទាក់ទងទៅនឹងសង្គ្រាមរុស្ស៊ី-អ៊ុយក្រែន និងវិបត្តិកូវីដ-១៩ និងសេដ្ឋកិច្ចជាដើម។ 

កិច្ចប្រជុំកំពូលអាស៊ានដែលជាកិច្ចប្រជុំធំនៃថ្នាក់ដឹកនាំកំពូលរបស់អាស៊ានជាមួយនឹងថ្នាក់ដឹកនាំពិភពលោក និងត្រូវរៀបចំឡើងចាប់ពីថ្ងៃទី១០ ខែវិច្ឆិកា រហូតដល់ថ្ងៃទី១៣ ខែវិច្ឆិកា ឆ្នាំ២០២២ នៅព្រះរាជាណាចក្រកម្ពុជា៕

PHOTO: ហ៊ុន យុទ្ធគុណ